ஈரோடு அருகே மரத்தில் கட்டிவைத்து விவசாயி அடித்துக் கொலை!
புதன், 24 செப்டம்பர் 2008 (12:48 IST)
ஈரோடு அருகே மரத்தில் கட்டிவைத்து விவசாயி அடித்து கொலை செய்யப்பட்டது இப்பகுதியில் பரபரப்பை ஏற்படுத்தியுள்ளது.
ஈரோடு மாவட்டம் பெருந்துறை அருகே உள்ள பாக்கரைதோப்பை சேர்ந்தவர் கருப்பன் (60). இவர் அதே பகுதியை சேர்ந்த பழனிவேல் என்பவரது தோட்டத்தை கடந்த சில ஆண்டுகளுக்கு முன் குத்தகைக்கு உழுது வந்தார். தற்போது இவர் இந்த தோட்டத்தை விட்டுவிட்டதால் இதை சின்னப்பநாய்க்கர் குத்தகைக்கு உழுது வருகிறார்.
இந்த தோட்டத்தில் கருப்பன் தன் ஆடுகளை மேய்த்துக்கொண்டிருந்தார். அப்போது இங்கு மேய்க்க கூடாது என்று சின்னப்ப நாய்க்கர் எச்சரிக்கை விடுத்தார். 'பல ஆண்டுகளாக இங்குதான் மேய்த்து வருகிறேன்' என கருப்பன் கூறியதால் இருவருக்கும் வாக்குவாதம் ஏற்பட்டது.
பின்னர் கருப்பன் தன் ஆடுகளை வீட்டிற்கு ஓட்டிசென்றுவிட்டார். பின் சின்னப்பநாய்க்கர், கருப்பன் வீட்டிற்கு சென்று அவரிடம் சமாதானம் பேசி வா வெளியே சென்று வரலாம் என கூறி அழைத்து சென்றார். பின் இருவரும் மது அருந்தியுள்ளனர். அதன்பின்னர் கருப்பனை தன் தோட்டத்திற்கு அழைத்து சென்று அங்கு தென்னை மரத்தில் கட்டிவைத்து அடித்து கொலை செய்தார்.
இது குறித்து பெருந்துறை காவல்துறையினர் வழக்கு பதிவு செய்து சின்னப்ப நாய்க்கரை தேடி வருகின்றனர். வீட்டில் இருந்தவரை அழைத்து சென்று கட்டிவைத்து அடித்து கொலை செய்த சம்பவம் இப்பகுதியில் பெரும் பரபரப்பை ஏற்படுத்தியுள்ளது.
