ஆதரவற்ற 40 மாணவிகளுக்கு ஆசிரியர் பயிற்சியில் சேர ஆணை: அமைச்சர் வழங்கினார்!
செவ்வாய், 9 செப்டம்பர் 2008 (18:25 IST)
தாம்பரம் அரசு சேவை இல்லத்தில் செயல்படும் அரசு மகளிர் ஆசிரியர் பயிற்சியில் சேர்வதற்கான சேர்க்கை ஆணையினை தேர்வு செய்யப்பட்ட 40 மாணவிகளுக்கு சமூகநலத்துறை அமைச்சர் கீதா ஜீவன் இன்று வழங்கினார்.
இது குறித்து தமிழக அரசு இன்று வெளியிட்டுள்ள செய்திக்குறிப்பில், "தமிழ்நாடு அரசு சமூக நலத்துறையின் கீழ் 7 சேவை இல்லங்களும், 27 அரசு குழந்தைகள் காப்பகங்களும் இயங்கி வருகிறன.
இதே போன்று 5 வயது முதல் 18 வயது வரை உள்ள பெற்றோர் இருவரையும் இழந்த தாய் அல்லது தந்தையை இழந்த, தொழுநோய் மற்றும் மனநிலை பாதிக்கப்பட்டு தொடர் சிகிச்சையில் இருந்து வரும் பெற்றோர்களின் குழந்தைகள், ஆயுள் தண்டனை பெற்று தாய்-தந்தையை இழந்த குழந்தைகள், ஆயுள் தண்டனை பெற்று சிறையில் இருக்கும் பெற்றோர்களின் குழந்தைகள் தங்களது பள்ளிக் கல்வியை 12ஆம் வகுப்பு வரையிலும் இலவசமாக அரசு குழந்தைகள் காப்பகங்களில் தங்கிப் பயில்வதற்கும் தமிழக அரசு உதவி செய்து வருகிறது.
இந்த சேவை இல்லங்களிலும், அரசு குழந்தைகள் காப்பகங்களிலும் படித்து 12ஆம் வகுப்பு தேர்ச்சி பெற்ற குழந்தைகள் 2 ஆண்டுகள் ஆசிரியை பயிற்சி பெற்று ஆசிரியை பணியில் சேர்வதற்கு ஏதுவாக சென்ற ஆண்டு (2007-2008) 40 மாணவியர்கள் தேர்வு செய்து, தாம்பரம் அரசு சேவை இல்ல வளாகத்தில் உள்ள ஆசிரியை பயிற்சி நிறுவனத்தில் பயின்று வருகின்றனர்.
