வன்முறையை தூண்டும் வகையில் பேசியதாக தொடரப்பட்ட வழக்கில் தொல்.திருமாவளவனுக்கு சிதம்பரம் நீதிமன்றம் கைது உத்தரவு பிறப்பித்து உள்ளது.
கடலூர் மாவட்டம், சேத்தியாத்தோப்பு அருகே உள்ள குமாரக்குடி பகுதியில் 1997ஆம் ஆண்டு தேர்தல் பிரசாரத்தின்போது விடுதலை சிறுத்தைகள் பொதுச்செயலாளர் தொல்.திருமாவளவன் கலந்து கொண்டு பேசினார். அப்போது, வன்முறையை தூண்டும் வகையில் பேசியதாகவும், அத்து மீறி பேசியதாகவும் அவர் மீது காவல்துறையினர் வழக்கு பதிவு செய்தனர்.
இந்த வழக்கு சிதம்பரம் சார்பு நீதிமன்றத்தில் நடந்து வந்தது. இந்த வழக்கில் விடுதலை சிறுத்தைகள் பொதுச்செயலாளர் தொல்.திருமாவளவன் ஆஜராகாமல் இருந்து வந்தார்.
இந்த நிலையில் இந்த வழக்கு நீதிபதி பிரகாசன் முன்னிலையில் நேற்று விசாரணைக்கு வந்தது. அப்போது, தொல்.திருமாவளவன் ஆஜராகாததால் அவருக்கு கைது உத்தரவு பிறப்பித்தார் நீதிபதி.
