''இந்துக்கள் மீது அடக்குமுறையைக் கையாண்டு வரும் மலேசியா மீது பொருளாதாரத் தடை விதிக்க வேண்டும்'' என்று இந்து முன்னணி அமைப்பாளர் ராமகோபாலன் வலியுறுத்தியுள்ளார்.
இது குறித்து இந்து முன்னணி அமைப்பாளர் ராமகோபாலன் வெளியிட்டுள்ள அறிக்கையில், மலேசியாவில் நடைபெற்ற ஆர்ப்பாட்டத்தின் போது கோலாலம்பூரில் உள்ள பத்துமலை முருகன் கோயிலுக்கு தரிசனத்திற்காக சென்ற 400 இந்து பக்தர்களை கோயில் வளாகத்திற்குள்ளேயே சுற்றி வளைத்த 300 காவல்துறையினர் அவர்களை அடித்துக் காயப்படுத்தியிருக்கிறார்கள். பயமுறுத்துவதற்காக அவர்கள் மீது ஜாமீனில் வெளிவர முடியாத சட்டப் பிரிவுகளின் கீழ் பொய் வழக்குப் போட்டு கொடுமைப்படுத்தி வருகிறார்கள். சாதாரண இந்த வழக்கில் கீழ் நீதிமன்றத்தில் வாதாடுவதற்கு மலேசிய நாட்டு அட்டர்னி ஜெனரல் தாமே நீதிமன்றத்திற்கு வந்து ஜாமீன் வழங்கக் கூடாது என்று வாதாடி இருக்கிறார்.
பாமாயில் இறக்குமதிக்குத் தடை விதிக்க வேண்டும்!
இந்துக்களை அடித்து விரட்ட "பூமி புத்ர” பிரச்சாரம் நடந்து வருவது வெட்கக்கேடு. பாரதத்தின் மைய அரசு குரல் எழுப்புவதன் மூலம், மலேசியா மீது பொருளாதாரத் தடை விதிப்பதோடு மட்டுமல்லாமல், பாரதம் மலேசியாவிலிருந்து இறக்குமதி செய்யும் பாமாயிலை நிறுத்த வேண்டும். இப்படி செய்வதன் மூலம் தான் மலேசிய நாட்டு அரசை வழிக்கு கொண்டு வர முடியும்.
இந்துக்கள் மீது போடப்பட்ட பொய் வழக்குகளை வாபஸ்பெற மத்திய அரசு வழிவகை செய்ய வேண்டும். சம உரிமை, சமநீதி, சம வாய்ப்புக் கிடைப்பது அத்தியாவசியம். இந்துக்கள் தன்மானத்துடனும், பாதுகாப்புடனும் வாழவும், மத்திய அரசு பொறுப்பு ஏற்க வேண்டும். இந்த பிரச்சனையில் மலேசிய நாட்டுப் பிரதமரிடம் பேசி நமது பாரதப் பிரதமர் இந்துக்கள் மீதான அடக்கு முறைகளை நிறுத்திக் கொள்ளும்படி நடவடிக்கை எடுக்க வேண்டும் என்று ராமகோபாலன் கூறியுள்ளார்.
