தமிழ்நாடு குடிநீர் வடிகால் வாரியத்தில் பணிக்காலத்தில் மரணமடைந்த பணியாளர்களின் வாரிசுதாரர்கள் 33 பேருக்கு கருணை அடிப்படையில் பணி நியமன ஆணையை உள்ளாட்சித்துறை அமைச்சர் மு.க.ஸ்டாலின் இன்று வழங்கினார்.
தமிழ்நாடு குடிநீர் வடிகால் வாரியத்தில் பணிக்காலத்தில் மரணமடைந்த பணியாளர்களின் வாரிசுதாரர்களில் ஒருவருக்கு கருணை அடிப்படையில் அரசு, வாரிய விதிமுறைகளின்படி 33 பேருக்கு பணி நியமன ஆணையை ஊரக வளர்ச்சி, உள்ளாட்சித்துறை அமைச்சர் மு.க. ஸ்டாலின் தலைமைச் செயலகத்தில் இன்று வழங்கினார்.
இதில் பத்து இளநிலை வரைவு அலுவலர்கள், எட்டு இளநிலை உதவியாளர்கள், எட்டு தட்டச்சர்கள், ஐந்து பொருத்துநர்கள், இரண்டு மின்பணியாளர்கள் அடங்குவர். மேலும், தமிழ்நாடு குடிநீர் வடிகால் வாரியத்தில் பணிபுரியும் சி, டி பிரிவு பணியாளர்களுக்கு 2006-07ஆம் ஆண்டிற்கான போனஸ் தொகை சுமார் 2.70 கோடி ரூபாய் வழங்கப்பட்டது. இதனால் 5,820 பணியாளர்கள் பயனடைந்தார்கள்.
இந்நிகழ்ச்சியில் நகராட்சி நிர்வாகம், குடிநீர் வழங்கல் துறை செயலாளர் கே.தீனபந்து, தமிழ்நாடு குடிநீர் வடிகால் வாரிய மேலாண்மை இயக்குனர் ஸ்வரண்சிங், பொறியியல் இயக்குனர் ம.துரைராஜ், வாரிய உயர் அதிகாரிகள் பங்கேற்றனர்.
