ம.தி.மு.க. பொதுச் செயலாளர் வைகோ விடுத்துள்ள அறிக்கையின் விவரம் வருமாறு :
முன்னாள் முதலமைச்சரான அ.இ.அ.தி.மு.க. பொதுச் செயலாளர் ஜெயலலிதாவின் வீட்டிற்குள் தீய நோக்கத்தோடு மர்ம நபர் ஒருவர் அத்துமீறி நுழைந்து வீட்டின் மேல்மாடி நூலகம் வரையிலும் சென்ற நிகழ்வு பெரும் அதிர்ச்சியை அளிக்கின்றது. ஜெயலலிதாவுக்கு அந்த நபரால் ஆபத்து ஏற்பட்டிருக்கக்கூடும் என்று நினைக்கும் போதே பதட்டமும், கவலையும் ஏற்படுகிறது.
தி.மு.க. ஆட்சிப் பொறுப்பேற்றவுடன் ஜெயலலிதாவுக்கு வழங்கப்பட்ட பாதுகாப்பு ஏற்பாடுகளைக் குறைத்தது. காவலர்களையும் பெருமளவில் திரும்பப் பெற்றுக் கொண்டுவிட்டது. தற்போது ஒப்புக்குப் பெயரளவில் சில காவலர்கள் பணியில் இருக்கிறார்கள்.
இந்நிலையில், மர்ம நபர் அனுமதி இல்லாமல் வீட்டிற்குள் நுழைய காவல்துறையினர் அனுமதித்தது திட்டமிட்ட ஏற்பாடுதானோ என்ற சந்தேகத்தை ஊட்டுகிறது.
முன்னாள் முதலமைச்சர் கலந்து கொள்ளும் நிகழ்ச்சிகளிலும் உரிய பாதுகாப்பினை காவல்துறை தருவதில்லை. காவல்துறை ஆளும் கட்சியின் எடுபிடியாக மாறிவிட்டதால்தான் ஜெயலலிதாவுக்கு கொடுக்கப்பட்ட பாதுகாப்பு விலக்கப்பட்டது.
தமிழக அரசுக்கும், காவல் துறைக்கும் கண்டனம் தெரிவிப்பதோடு, ஜெயலலிதாவுக்குத் தகுந்த பாதுகாப்பு வழங்க வேண்டுமென்பது அரசின் கடமை என்று வலியுறுத்துகிறேன்'' என்று கூறியுள்ளார்.
