இது வாரிசுகளின் காலம். அந்த வரிசையில் இணைந்து அழுத்தமாகத் தன்னைப் பதிவு செய்து இருப்பவர் ஸ்ரீகாந்த் தேவா. கை நிறைய படங்களுடன் வலம் வரும் அவரை "பழனி" படத் தொடக்க விழாவில் சந்தித்தோம்.
தேவாவின் மகன் என்பது உங்களுக்கு எந்த விதத்தில் பலமாக இருக்கிறது?
அப்பாவை எல்லாருக்கும் தெரியும். அப்பாவுக்கும் எல்லாரையும் தெரியும். அது மட்டுமல்ல அப்பாவுடன் படங்களில் ஒர்க் பண்ணாதவர்கள் கூட அப்பா மீது நல்ல மதிப்பு வைத்திருக்கிறார்கள். அதுதான் அப்பா தேடி வைத்திருக்கும் சொத்து. அதனால் தேவா சாரின் மகன் என்பதால் எனக்கு மதிப்பு, அடையாளம், அன்பு எல்லாமே கிடைக்கிறது. அதனால் நான் சினிமாவில் நுழைவது சுலபமாக இருந்தது. யாரையும் அணுகுவது சுலபமாக இருக்கிறது. ஆனால் இது அறிமுக நிலைக்கு மட்டுமே உதவும். உள்ளே நுழைய உதவி செய்யும் விசிட்டிங் கார்டு மாதிரி. ஆனால் நிற்பது நிலைப்பது என்னால் செய்யப்பட வேண்டியது. அதற்காக நான் உழைக்க வேண்டும். என் உழைப்பால் மட்டுமே மேலே வர முடியும் இது என் அப்பாவின் அறிவுரை. நான் புரிந்து வைத்துள்ள அனுபவம். விசிட்டிங் கார்டு உள்ளே நுழைய உதவலாம். வேலை வாங்கித் தர உதவாது. அது நம்முடைய திறமையில் தான் இருக்கிறது.
தேவாவின் வாரிசு ஸ்ரீகாந்த் தேவா என்பதை பலவீனமாக உணர்கிறீர்களா?
சில நேரம் இருவரையும் ஒப்பிடும் போது சங்கடமாக இருக்கும். வளர்ந்தவர்களுடன் வளரும் கலைஞர்களை ஒப்பிடுவது தவறானது. அப்பா பெயரைச் சொல்லி என்னைக் குறிப்பிடுவது பற்றிப் பலரும் கேட்டதுண்டு. காலம் மாறும். அப்போது நிலைமை மாறும். எஸ்.ஏ.சந்திரசேகர் சார் பையன் விஜய் என்றார்கள். இப்போது விஜய் அப்பா சந்திரசேகர் என்கிறார்கள். இளையராஜா சார் பையன் யுவன் ஷங்கர்ராஜா என்றார்கள். இப்போது யுவனின் அப்பா ராஜா சார் என்கிறார்கள். சிவகுமார் சார் மகன் சூர்யா என்றார்கள். இப்போது சூர்யாவின் அப்பா என்று தான் சிவகுமார் சாரைச் சொல்கிறார்கள். இது மாற்றம். வெற்றிகளால் வந்த மாற்றம். இது ஸ்ரீகாந்த்தின் அப்பா தேவா சார்னு அப்பாவைக் கூப்பிடும் நாள் வரும். நான் முன்பு சொன்னவங்க ஜெயிச்ச மாதிரி நானும் ஜெயிப்பேன். அப்போது என்னோட அப்பா என்று சொல்ல வைப்பேன். அதற்குத் தான் உழைத்து வருகிறேன்.
இதற்காக என்ன முயற்சி எடுத்து வருகிறர்கள்?
கடின உழைப்பு தான். இது என் இருபதாவது படம். இது என் இருபத்தொன்றாவது படம் என்று நான் சொல்வதில்லை. ஒவ்வொரு படமும் என் முதல் படம் போலவே நினைக்கிறேன். முதல் படத்தின் பயத்தோடும் அக்கறையோடும் தான் உழைக்கிறேன். ஒவ்வொரு புதுப்படத்திலும் இதே உணர்வோடு தான் வேலை பார்க்கிறேன். இது என் அப்பாவுக்கு கொடுக்கும் மரியாதையாக நினைக்கிறேன்.
இது குத்து பாட்டு சீசனா?
இப்போது குத்து பாட்டு என்கிறோம். இதே ஸ்டைலில் அந்தக் காலத்திலும் பாடல்கள் வந்திருக்கிறது. மகிழ்ச்சியில் அதிரடியாக ஆடிப்பாடுவது பழைய விஷயம் தான். எனக்கு குத்துப் பாட்டு, கானா மட்டுமல்ல மெலடியிலும் கலக்க வேண்டும் என்று ஆசை உள்ளது.
அப்பா உங்களுக்கு எப்படி உதவுவார்?
என்னை சுதந்திரமாக இருக்க வைத்து வேலை பார்க்க வைப்பது அவர் செய்யும் பெரிய உதவி. எது பற்றியும் சொல்லும் போதும் சாதக பாதகங்களைச் சொல்வார். ஆனால் முடிவெடுப்பது நீதான் என்பார். அப்போது தான் யோசிக்க முடியும் என்பது அவர் கொள்கை. என் இசை பற்றி அபிப்ராயம் சொல்வார். ஆனால் தன் கருத்தை என் மீது திணிக்க மாட்டார். அதுதான் அவர் செய்யும் உதவி என்பேன். எனக்கு ஊக்கம் தருவதும் அதுதான்.
"பழனி"யில் மீண்டும் பேரரசுவுடன் இணைந்திருப்பது பற்றி..?
மிகவும் மகிழ்ச்சியான விஷயம். பேரரசு சாருடன் நான் இணையும் மூன்றாவது படம் "பழனி". நான் அவருடன் இணைந்த முதல் படம் "சிவகாசி". சாதாரண இசையமைப்பாளராக இருந்த என்னை உலக அளவில் கொண்டு போய்ச் சேர்த்தவர் அவர். "சிவகாசி"க்குப் பிறகு தான் எனக்குப் பெரிய அங்கீகாரம் கிடைத்தது. இன்று நான் வளர்ந்து வர அவர் கொடுத்த அங்கீகாரம் காரணம் என்பேன். இந்தப் "பழனி"யில் பாடல்கள் நன்றாக வர என்னென்ன தேவையோ அனைத்தையும் செய்யலாம் என்றிருக்கிறார். அது போதாதா எனக்கு? பரத்துடன் நான் இணையும் மூன்றாவது படம் "பழனி". ஏற்கெனவே "கில்லாடி", "நேபாளி".
இப்போது இசையமைக்கும் படங்கள்?
இந்த "பழனி", "நேபாளி", "கில்லாடி", "தெனாவெட்டு", "பெருமாள்", "ஆயுதம் செய்வோம்" உள்பட பத்துப் படங்கள் உள்ளன. ஓர் இசையமைப்பாளனாக ஒவ்வொன்றும் ஒவ்வொரு அனுபவம் தரும்படி உள்ளது. இவற்றில் என்னை நிரூபித்துக் காட்டுவேன்.
