கிரிக்கெட் வீரரிடம் மாதவன் பட்ட அவமானம்… அது கற்றுக்கொடுத்த பாடம்!

நடிகர் மாதவன் சிறுவயதில் கிரிக்கெட் வீரர் ஒருவருடன் நடந்த மோசமான அனுபவம் ஒன்றை தற்போது பகிர்ந்துகொண்டுள்ளார்.

நடிகர் மாதவன் தமிழ் மற்றும் இந்தி படங்களில் நடித்ததன் மூலம் இந்தியா முழுவதும் பிரபலமாக அறியப்படுபவர். மேலும் சமூகவலைதளங்கள் மூலமாக அவ்வப்போது ரசிகர்களுடன் தொடர்பிலும் இருந்து வருகிறார். சமீபத்தில் அவர் தன்னுடைய டிவிட்டர் பக்கத்தில் பகிர்ந்த ஒரு வீடியோ கவனத்தை ஈர்த்துள்ளது.

அந்த வீடியோவில் மாதவன் ‘நான் 8 வயதாக இருக்கும் போது அப்போது பிரபலமாக இருந்த கிரிக்கெட் வீரரை சந்திக்கும் வாய்ப்பைப் பெற்றேன். அப்போது என் நண்பர்களுடன் அவரிடம் ஆட்டோகிராப் வாங்க சென்றேன். அவரோ யாரிடமோ பேசிக்கொண்டே 50 கையெழுத்துகளைப் போட்டுத்தந்தார். அது எனக்கு மிகவும் அவமானமாக இருந்தது.

அந்த சம்பவம்தான் எனது வாழ்க்கையில் எனக்கு பணிவைக் கற்றுத்தந்தது. இப்போது என்னிடம் யாராவது ஆட்டோகிராப் கேட்டால் நான் அவர்களின் கண்களைப் பார்த்துக்கொண்டே போட்டுக்கொடுப்பேன்’ எனக் கூறியுள்ளார். ஆனால் அந்த கிரிக்கெட் வீரர் யார் என்பதை அவர் சொல்லவில்லை.