தி.நகர் கடைகளைத் திறக்க மேலும் 8 வாரத்திற்கு அனுமதி

சென்னை தியாகராய நகரில் விதிகளை மீறிக் கட்டப்பட்ட கட்டடங்களைத் திறக்க மேலும் 8 வார காலத்துக்கு அனுமதியை நீட்டித்து சென்னை உயர்நீதிமன்றம் உத்தரவிட்டுள்ளது.

தியாகராய நகரில் விதிகளை மீறி கட்டப்பட்ட கட்டடங்கள் சீலிடப்பட்டன. இதை எதிர்த்து வணிகர்கள் உச்சநீதிமன்றத்தில் மனுத்தாக்கல் செய்திருந்தனர்.

அந்த மனுக்களை விசாரித்த உச்சநீதிமன்றம் விதிகளை மீறி கட்டப்பட்ட கட்டடங்களை பண்டிகை காலத்துக்காக 6 வாரங்களுக்கு திறக்க அனுமதி அளித்திருந்தது. தற்போது அந்த அனுமதியை மேலும் 8 வாரகாலத்துக்கு நீட்டித்து சென்னை உயர்நீதிமன்றம் உத்தரவிட்டுள்ளது.

விதிகளை மீறிய கட்டடங்களை அனுமதிக்க சில நிபந்தனைகளுடன் நீதிபதி மோகன் குழு பரிந்துரைத்துள்ளது. 2007- ஜூலைக்கு முன் கட்டப்பட்ட கட்டடங்களுக்கு மோகன் குழு சலுகைகளை அளித்துள்ளது. மோகன் குழுவின் பரிந்துரையை பரிசீலீக்க அரசுக்கு உயர்நீதிமன்றம் 6 வாரம் அவகாசம் அளித்துள்ளது.