ஈரோடு வனப்பகுதியில் உயிருக்கு போராடிய பெண் யானை பரிதாபமாக இறந்தது.
ஈரோடு மாவட்டம் சத்தியமங்கலம் வனகோட்டத்தை சேர்ந்த சத்தியமங்கலம் வனப்பகுதி கடாட்டியில் கடந்த வாரம் நோய்வாய்பட்டு ஒரு ஆண் யானை பரிதாபமாக இறந்தது. இது பற்றி தகவல் கிடைத்ததும் மாவட்ட வனஅதிகாரி இராமசுப்பிரமணியம், வனத்துறை மருத்துவர் மனோகரன் மற்றும் வனவர் சிவமல்லு உள்ளிட்டோர் நிகழ்விடத்திற்கு சென்று யானையை பிரேத பரிசோதனை செய்து அதே இடத்தில் அடக்கம் செய்தனர்.
அதே பகுதியில் ஒரு பெண் யானை நோய்வாய்பட்டு உயிருக்கு போராடிக்கொண்டிருந்தது. இந்த யானையை காப்பாற்ற வனத்துறையினர் தொடர்ந்து சிகிச்சை அளித்தனர். ஆனால் நோய்வாய்பட்ட பெண் யானை சிகிச்சை பலனின்றி இறந்தது.
2008 வருடத்தின் தொடக்கத்தில் இருந்து சத்தியமங்கலம், கோவை, தர்மபுரி உள்ளிட்ட வனப்பகுதியில் தொடர்ந்து யானைகள் இறந்து வருவது குறிப்பிடதக்கது.
இது குறித்து வனத்துறை அதிகாரி ஒருவர் கூறுகையில், 2008ஆம் ஆண்டு யானைகளுக்கு மோசமான வருடம் என்றார்.
அதே சமயத்தில் ஜோதிடர் ஒருவர் கூறுகையில், இந்த ஆண்டு சங்கராத்தி யானை மீது அமர்ந்து வந்துள்ளதால் யானைகள் அதிகளவில் இறக்கும் என்றார்.
