திருச்சி அருகே சாலை விபத்து: 2 பேர் பலி, 25 பேர் படுகாயம்!
சனி, 15 மார்ச் 2008 (11:27 IST)
திருச்சி மாவட்டம், பொன்னம்பலபட்டி அருகே திருச்சி-திண்டுக்கல் தேசிய நெடுஞ்சாலையில் நேற்று இரவு ஏற்பட்ட சாலை விபத்தில 2 பேர் பலியாயினர். 25 பேர் படுகாயமடைந்தனர்.
வீராப்பூர் என்னுமிடத்தில் உள்ள ஒரு கோவில் திருவிழாவுக்கு சென்றுவிட்டு, திண்டுக்கல் மாவட்டத்தில் உள்ள தங்களது கிராமத்துக்கு மினி வாகனத்தில் திரும்பிக் கொண்டிருந்தவர்கள் மீது எதிர் திசையில் வந்து கொண்டிருந்த அரசு போக்குவரத்து கழக பேருந்து பயங்கரமாக மோதியது.
இந்த விபத்தில், திண்டுக்கல் மாவட்டம், அய்யலூர் என்னுமிடத்தைச் சேர்ந்த பாப்பம்மாள் (50), மினி வாகன ஓட்டுனர் எம். சீனிவாசன் ஆகியோர் பலியாயினர். மேலும் 25 பேர் படுகாயமடைந்தனர்.
இதில் பாப்பம்மாள் சிகிச்சைக்காக மருத்துவமனைக்கு கொண்டு செல்லும் வழியில் உயிரிழந்தார். படுகாயத்துடன் திண்டுக்கல்லில் உள்ள தனியார் மருத்துவமனையில் அனுமதிக்கப்பட்ட சீனிவாசன் அங்கு சிகிச்சை பலனின்றி உயிரிழந்தார்.
மேலும், இந்த விபத்தில் படுகாயமடைந்தவர்கள் அங்குள்ள அரசு தலைமை மருத்துவமனையில் சிகிச்சைக்காக அனுமதிக்கப்பட்டுள்ளதாக காவல் துறையினர் தெரிவித்துள்ளனர்.
