வங்கி ஊழியர்கள் வேலை நிறுத்தம்: ஏ.டி.எம். சேவை முடங்குகிறது!
புதன், 24 செப்டம்பர் 2008 (09:25 IST)
வங்கிகளை இணைக்கக் கூடாது என்பது உள்பட பல்வேறு கோரிக்கைகளை வலியுறுத்தி, நாடு முழுவதும் பொதுத்துறை மற்றும் தனியார் வங்கி ஊழியர்கள் இன்று முதல் இரண்டு நாள் வேலை நிறுத்தத்தில் ஈடுபட்டுள்ளனர். இதனால் ஏ.டி.எம். சேவை முடங்கும் அபாயம் ஏற்பட்டுள்ளது.
இதுகுறித்து வங்கி ஊழியர்களின் தேசிய கூட்டமைப்பின் தலைவர் எல்.பாலசுப்பிரமணியன் விடுத்துள்ள அறிக்கையில், 10 லட்சம் வங்கி ஊழியர்களை உறுப்பினராக கொண்ட 9 தொழிற்சங்கங்களின் அமைப்பான வங்கி தொழிற்சங்கங்களின் ஒருங்கிணைந்த அமைப்பு பொதுத்துறை வங்கிகளை தனியார் மயமாக்கலை எதிர்த்தும், ரகுராம் ராஜன் ஆணையம், ஹோடா ஆணையத்தின் பரிந்துரைகளை நிராகரிக்கக் கோரியும், வங்கிகள் இணைப்பை எதிர்த்தும், ஒப்பந்தங்களை குறித்த காலத்தில் நிறைவேற்றக்கோரியும், 9-வது ஊதிய உயர்வு பேச்சுவார்த்தையை விரைவுபடுத்தக்கோரியும் இன்றும், நாளையும் 2 நாட்கள் அகில இந்திய வேலை நிறுத்தம் செய்ய அழைப்பு விடுத்திருந்தது.
இதுகுறித்து மத்திய அரசின் முதன்மை தொழிலாளர் ஆணையர் முன்னிலையில் நேற்று காலை சமரச பேச்சுவார்த்தை நடந்தது. இது தோல்வியில் முடிவடைந்ததால், இந்த போராட்டம் ஊழியர்கள் மற்றும் அதிகாரிகள் மீது திணிக்கப்பட்டுள்ளது. எனவே இன்றும், நாளையும் வேலை நிறுத்தம் திட்டமிட்டபடி நடைபெறும்'' என்று பாலசுப்பிரமணியன் கூறியுள்ளார்.
