அமெரிக்கப் படைகள் ஏவுகணைத் தாக்குதல்: பாகிஸ்தானில் 4 பேர் பலி

பாகிஸ்தானின் தெற்கு வசிரிஸ்தானில் அமெரிக்கப் படைகள் நடத்தியதாகக் கருதப்படும் ஏவுகணைத் தாக்குதலில் 4 பேர் உயிரிழந்திருக்கலாம் என தெரிவிக்கப்பட்டுள்ளது.

தெற்கு வசிரிஸ்தானின் சுல்தானா கிராமத்தில் உள்ள பள்ளி ஒன்றின் மீது இன்று காலை 10 மணியளவில் 2 ஏவுகணைகள் வீசி தாக்குதல் நடத்தப்பட்டதாகவும், இதில் இடிபாடுகளில் சிக்கி 4 பேர் உயிரிழந்ததாகவும் அப்பகுதியைச் சேர்ந்த ஒருவர் கூறியுள்ளார்.

இத்தாக்குதலில் பள்ளிக் கட்டிடம் முற்றிலுமாக சேதமடைந்துள்ளதால், இடிபாடுகளில் இன்னும் யாராவது சிக்கியுள்ளார்களா என்பது குறித்த தகவல் வெளியாகவில்லை.

தெற்கு வசிரிஸ்தானில் அல்-கய்டா, தாலிபான் ஆதிக்கம் உள்ள பகுதிகளைக் குறிவைத்து ஆப்கானிஸ்தான் எல்லையில் உள்ள அமெரிக்கப் படைகள் நேற்று தாக்குதல் நடத்தின. இதில் 5 பேர் உயிரிழந்தது குறிப்பிடத்தக்கது.