இந்தியாவிடம் வலுவான ஆதாரம் கோர பாகிஸ்தான் முடிவு!
ஞாயிறு, 7 டிசம்பர் 2008 (14:19 IST)
மும்பை பயங்கரவாதத் தாக்குதல்களில் பாகிஸ்தானியர்களுக்குத் தொடர்பு உள்ளது என்பதற்கான வலுவான ஆதாரங்களைத் தருமாறு இந்தியாவிடம் கேட்பது என்று பாகிஸ்தான் முடிவு செய்துள்தாக செய்திகள் தெரிவிக்கின்றன.
இஸ்லாமாபாத்தில் நேற்று பிரதமர் யூசுப் ரசா கிலானி தலைமையில அமைச்சர்கள், ராணுவ அதிகாரிகள், எதிர்க்கட்சித் தலைவர்கள் பங்கேற்புடன் நடந்த இரண்டு கூட்டங்களுக்குப் பிறகு பாகிஸ்தான் அரசு இம்முடிவை எடுத்துள்ளதாக தெரிகிறது.
இந்தக் கூட்டங்களில் பாகிஸ்தானின் கிழக்கு, மேற்கு மாகாணங்களின் பாதுகாப்பு, மும்பை பயங்கரவாதத் தாக்குதல் எதிரொலி ஆகியவை உள்ளிட்ட பல்வேறு முக்கிய விடயங்கள் பேசப்பட்டுள்ளன.
இந்தக் கூட்டங்கள் தொடர்பாக அரசு தரப்பில் பேட்டி எதுவும் கொடுக்கப்படாத நிலையில், "தேசிய முக்கியத்துவம் வாய்ந்த பல்வேறு விடயங்கள் பேசப்பட்டன" என்ற குறிப்புடன் அறிக்கை மட்டும் வெளியிடப்பட்டுள்ளது.
முதல் கூட்டத்தில் பாதுகாப்பு அமைச்சர் சொளத்ரி அகமது முக்தார், அயலுறவு அமைச்சர் ஷா முகமது குரேஷி, ராணுவத் தளபதி ஜெனரல் அஸ்ஃபாக் பர்வேஷ் கயானி, ஐ.எஸ்.ஐ. தலைவர் லெப்டினன்ட் ஜெனரல் அகமது சுஜா பாசா ஆகியோர் பங்கேற்றனர்.
இரண்டு மணி நேரத்திற்கும் மேல் நீடித்த இந்தக் கூட்டத்தில், பாகிஸ்தானின் மீது ஆதாரமில்லாத குற்றச்சாற்றுக்களை சுமத்த வேண்டாம் என்று இந்தியவை கேட்டுக்கொள்வது என்றும், வலுவான ஆதாரங்களைத் தருமாறு கேட்பது என்றும் முடிவு செய்யப்பட்டதாக செய்திகள் தெரிவிக்கின்றன.
மற்றொரு கூட்டத்தில் எதிர்க்கட்சித் தலைவர்கள் மட்டும் பங்கேற்றனர். இதிலும் அதே முடிவு எடுக்கப்பட்டதாகத் தெரிகிறது.
