அமெரிக்க ஏவுகணைத் தாக்குதல்: பாக்.கில் 6 பேர் பலி!

பாகிஸ்தானின் வசிரிஸ்தான் மலைப்பகுதியில் அமெரிக்கப் படைகள் நடத்தியதாகக் கூறப்படும் ஏவுகணைத் தாக்குதலில் 6 பேர் பலியாகியுள்ளனர். மேலும் 5 பேர் காயமடைந்ததாக செய்திகள் தெரிவிக்கின்றன.

பைதுல்லா மெஹ்சூத் தலைமையிலான தலிபான் பயங்கரவாதிகள் ஆதிக்கம் அதிகமுள்ள தெற்கு வசிரிஸ்தானின் தபர்கை கிராமத்தில் உள்ள 2 குடியிருப்புகள் மீது அமெரிக்கப் படைகள் 3 ஏவுகணைகளை வீசி தாக்குதல் நடத்தியதாக அப்பகுதி மக்கள் கூறியுள்ளனர்.

இதில் குடியிருப்பின் இடிபாடுகளில் சிக்கி 4 பேர் உயிரிழந்ததாகவும், இடிபாடுகளுக்கும் மேலும் சிலர் சிக்கியிருக்கலாம் என்பதால் பலி எண்ணிக்கை உயரும் என்றும் அவர்கள் அச்சம் தெரிவித்தனர். அயல்நாடுகளைச் சேர்ந்த தீவிரவாதிகளும் அப்பகுதியில் உள்ள குடியிருப்பில் பதுங்கியிருக்கலாம் என்றும் அப்பகுதி மக்கள் சந்தேகம் தெரிவித்துள்ளனர்.