அணு சக்தி ஒப்பந்த‌ம்: செனட் சபை‌யி‌ல் நாளை வா‌க்கெடு‌ப்பு!

இந்திய-அமெரிக்க அணு சக்தி ஒத்துழைப்பு ஒப்பந்தத்தை நடைமுறைப்படுத்துவதற்கான அமெரிக்க செனட் சபையின் ஒப்புதல் நாளை பெறப்படும் என புஷ் நிர்வாகம் நம்பிக்கை தெரிவித்துள்ளது.

இதுகுறித்த தகவலை வெள்ளை மாளிகை உயரதிகாரி ஒருவர் இந்திய-அமெரிக்க சமுதாயத்தின் மூத்த தலைவர்களிடம் நேற்று தெரிவித்ததாக கூறப்படுகிறது.

கடந்த 28ஆம் தேதி அணு சக்தி ஒத்துழைப்பு ஒப்பந்தத்திற்கு அமெரிக்க நாடாளுமன்றத்தின் பிரதிநிதிகள் சபை ஒப்புதல் அளித்தது. இந்த ஒப்பந்தம் மீதான வாக்கெடுப்பில் ஆதரவாக 298 வாக்குகளும், எதிராக 117 வாக்குகளும் பதிவானது.

இதையடுத்து நாளை அமெரிக்க செனட் சபையில் அணு சக்தி ஒப்பந்தம் மீதான விவாதமும், வாக்கெடுப்பும் நடத்தப்படும் என வெள்ளை மாளிகைத் தகவல்கள் தெரிவிக்கின்றன.

அமெரிக்க பிரதிநிதிகள் சபையின் அனுமதியைப் பெற மூன்றில் இரண்டு பங்கு உறுப்பினர்களின் ஆதரவு தேவை என்றாலும், செனட் சபையில் சாதாரண பெரும்பான்மையே போதும் என்பதால் இந்திய-அமெரிக்க அணு சக்தி ஒத்துழைப்பு ஒப்பந்தத்திற்கு செனட் அனுமதி கிடைப்பதில் சிக்கல் இருக்காது என அதிபர் புஷ் ஏற்கனவே தெரிவித்திருந்தது நினைவில் கொள்ளத்தக்கது.