இலங்கைப் பிரச்சனை: 13வது திருத்தமும், அதிகாரப் பகிர்வும்!
சனி, 15 நவம்பர் 2008 (13:18 IST)
PIB Photo
PIB
இலங்கை இனப் பிரச்சனைக்கு பேச்சுவார்தையின் மூலம் அரசியல் தீர்வு காணுமாறு பிரதமரைச் சந்தித்த சிறிலங்க அதிபர் மகிந்த ராஜபக்சாவிடம் கூறியுள்ள அயலுறவு அமைச்சர் பிரணாப் முகர்ஜி, அந்நாட்டு அரசியல் சட்டத்தில் மேற்கொள்ளப்பட்ட 13வது திருத்தத்தின்படி, அதிகாரப் பகிர்வு செய்து பிரச்சனைக்குத் தீர்வு காணுமாறும் வலியுறுத்தியுள்ளார்.
இலங்கை இனப் பிரச்சனையை பொறுத்தவரை இந்திய அரசின் நிலைப்பாடாகவே 13வது திருத்தமும், அதிகாரப் பகிர்வும் இருக்கிறது. அதிகாரப் பகிர்வளித்து தீர்வு காண முடியும் என்ற பேச்சும், சிறிலங்க அரசமைப்புச் சட்டத்தில் மேற்கொள்ளப்பட்ட 13வது திருத்தம் தமிழர்களின் அரசியல் உரிமையை உறுதிபடுத்தும் என்று மத்திய அரசும், காங்கிரஸ் கட்சியும், இங்குள்ள சில கட்சிகளும் கூறிவருவது எவ்வளவு பெரிய அறியாமை, யதார்த்தம் புரியாமை என்பது சந்தேகத்திற்கிடமின்றி நிரூபணமாகியுள்ளது.
இலங்கை இனப்பிரச்சனைக்குத் தீர்வு காண முன்னாள் பிரதமர் ராஜீவ் காந்தியும், சிறிலங்க முன்னாள் அதிபர் ஜுலியஸ் ரிச்சர்ட் ஜெயவர்த்தனேயும் 1987ஆம் ஆண்டு ஜூலை 29ஆம் தேதி கையெழுத்திட்ட இந்திய-இலங்கை ஒப்பந்தத்தின் முக்கிய அம்சம், சிறிலங்க அரசமைப்புச் சட்டத்தில் ஒரு திருத்தம் செய்து (அதுவே பின்னாளில் 13வது திருத்தம் என்றானது) அதன் மூலம் தமிழர்களுக்கு அரசியல் உரிமைகளையும், தமிழர்கள் அதிகம் வாழும் வடக்கு, கிழக்கு மாகாணங்களை இணைத்து, இந்தியாவில் உள்ள மாநிலங்களைப்போல, ஒரு நிர்வாக அமைப்பை ஏற்படுத்தி, அவைகளுக்கு அதிகாரப் பகிர்வளித்து, அதன் மூலம் இலங்கையின் ஒற்றுமைக்கு (unitary Srilanka) உட்பட்டு அரசியல் ரீதியான தீர்வு காண்பது என்பதாகும்.
இவ்வளவுதான் அதிகாரப் பகிர்வு!
Puthinam Photo
PUTHINAM
இந்த நிலையில், இலங்கையின் கிழக்குப் பகுதியில் சிறிலங்க அரசு தேர்தல் நடத்தி அமைத்த கிழக்கு மாகாண சபையின் முக்கிய அமைச்சரான எம்.எல்.ஏ.எம். ஹிஸ்புல்லா என்பவர் 13வது திருத்தத்தின் படி தங்களது மாகாண சபைக்கு அளிக்கப்பட்ட அதிகாரங்கள் ஒவ்வொன்றையும் சிறிலங்க அரசு திரும்பப்பெற்று வருகிறது என்று குற்றம் சாற்றியதோடு மட்டுமின்றி அமைச்சர் பதவியிலிருந்தும் விலகியுள்ளார்.
இன்றுள்ள சிறிலங்க அரசமைப்புச் சட்டத்தின்படி செய்யப்படும் அதிகாரப் பகிர்வு எப்படிப்பட்ட மாயை என்பதை, கொழும்புவிலிருந்து வெளிவரும் வீரகேசரி என்ற நாளிதழிற்கு அளித்த பேட்டியில் அவர் விரிவாக விளக்கியுள்ளார்.
“13வது திருத்தத்தின் கீழ் மாகாண சபைகளுக்கு அளிக்கப்படும் அதிகாரங்களை ஒரு அரசிதழின் (Gazette) வாயிலாகவோ அல்லது ஒரு சுற்றறிக்கையின் மூலமோ சிறிலங்க அரசால் திரும்பப்பெற்றுவிட முடியும்” என்று ஹிஸ்புல்லா கூறியுள்ளார்.
“13வது திருத்தத்தின்படி, நீர்ப்பாசனம், விவசாயம், நிலம் உள்ளிட்ட பல்வேறுத் துறைகளின் அதிகாரங்கள் மாகாண சபைக்கு வழங்கப்பட்டது. மாகாணத்தின் காவல் துணை ஆய்வாளரை நியமிக்கும் அதிகாரம் கூட வழங்கப்பட்டது. ஆனால், எல்லாம் எழுத்தில்தான் உள்ளனவே தவிர நடைமுறையில் இல்லை. மாகாண சபைகளுக்கு அளிக்கப்பட்ட அதிகாரங்களை ஒன்றன் பின் ஒன்றாக மத்திய அரசு திரும்பப் பெற்றுவிடுகிறது” என்று கூறியுள்ள ஹிஸ்புல்லா, ஒரு காவலரை இடமாற்றம் செய்யக்கூட மாகாண சபைக்கு அதிகாரம் இல்லை என்று கூறியுள்ளார்.
அதிகாரம் அளித்தால்தான் அமைதி திரும்பும் என்று கூறியுள்ள ஹிஸ்புல்லா, அது குறித்து தானும் முதலமைச்சர் சிவநேசன்துரை சந்திரகாந்தன் பிள்ளையனும் அதிபர் மகிந்த ராஜபக்ச, அவருடைய சகோதரர் பசில் ராஜபக்ச ஆகியோரை சந்தித்து பேசியதாகவும், ஆயினும் மாகாணங்களுக்கு அதிக அதிகாரம் பெறுவது மிகக் கடினமான காரியம் என்று கூறியுள்ளார்.
13வது சட்டத் திருத்தத்தின் கீழ் கிழக்கு மாகாண சபைக்கு அளிக்கப்பட்ட அதிகாரங்கள் அனைத்தும் இழக்க நேர்ந்தால் இளைஞர்கள் மீண்டும் ஆயுதம் ஏந்தும் நிலைக்கு தள்ளப்படுவார்கள் என்று எச்சரித்துள்ள ஹிஸ்புல்லா, சிறிலங்க முஸ்லீம் காங்கிரஸில் இருந்தவர், அதிலிருந்து வெளியேறி ஐக்கிய மக்கள் விடுதலை கூட்டணி சார்பில் போட்டியிட்டு வெற்றி பெற்று மாகாண சபையில் இரண்டாவது இடத்திலிருந்த அமைச்சர் என்பது குறி்ப்பிடத்தக்கது.
அனைத்துக் கட்சிக் குழு உலகை ஏமாற்றவே!
webdunia photo
FILE
இதற்கிடையே, இனப்பிரச்சனைக்கு அரசியல் ரீதியான தீர்வு காண பரிந்துரைகள் தருமாறு சிறிலங்க அதிபரால் நியமிக்கப்பட்ட அனைத்துக் கட்சி பிரதிநிதிகள் குழு (All Party Representative Commitment-APRC) இந்தியாவையும், உலக நாடுகளையும் ஏமாற்ற உருவாக்கப்பட்டதே என்று இலங்கை நாடாளுமன்றத்தின் தமிழர் தேசக் கூட்டணியின் உறுப்பினரான சுரேஷ் பிரேமசந்திரன் கூறியுள்ளார்.
ஈழ மக்கள் புரட்சிகர விடுதலை முன்னனியை (EPRLF (Suresh)) சேர்ந்த சுரேஷ் பிரேமசந்திரன், அனைத்துக் கட்சி பிரதிநிதிகள் குழு என்று அழைக்கப்படும் இக்குழுவில், தமிழ் தேசியக் கூட்டணி இடம்பெறவில்லை என்பது மட்டுமின்றி, முக்கிய எதிர்க்கட்சியான ஐக்கிய தேசியக் கட்சியும், ஆட்சிக்கு ஆதரவளித்து வந்த ஜனதா விமுக்தி பெரமுணாவும் அதிலிருந்து விலகிவிட்ட நிலையில் அது அனைத்துக் கட்சிக் குழுவே அல்ல என்று கூறியுள்ளார்.
இந்தக் குழுவைக் கொண்டு 13வது திருத்தத்தையே மீண்டும் பரிந்துரைக்கச் செய்து அதன் மூலம் அதிகாரப் பகிர்வுத் திட்டத்தை செயல்படுத்தவே சிறிலங்க அதிபர் முயற்சிக்கிறார் என்று குற்றம் சாற்றியுள்ள சுரேஷ் பிரேமசந்திரன், தற்பொழுதுள்ள சிறிலங்க அரசமைப்புச் சட்டத்தின்படி அதிகாரப் பகிர்வு என்பதே சாத்தியமில்லை என்று கூறியுள்ளார்.
இன்றுள்ள அரசமைப்புச் சட்டத்தின்படி, மாகாண சபைகளுக்கு அளிக்கப்படும் அதிகாரங்களை எப்பொழுது வேண்டுமானாலும் மத்திய அரசு திரும்பப் பெற்றுக்கொள்ளலாம் என்று சுரேஷ் கூறியுள்ளார். இதுதான் நடந்துவருகிறது என்று கிழக்கு மாகாண சபையின் அமைச்சர் ஹிஸ்புல்லாவும் கூறியுள்ளார்.
இதற்கான காரணத்தையும் தமிழ்நெட்.காம் இணையத்தளத்திற்கு அளித்துள்ள பேட்டியில் விளக்கியுள்ளார் சுரேஷ் பிரேமசந்திரன். “சிறிலங்க அரசமைப்புச் சட்டத்தின் 76வது பிரிவின்படி, அந்நாட்டு நாடாளுமன்றம் மட்டுமே சட்டமியற்றக்கூடிய அதிகாரம் பெற்ற அமைப்பு, அந்த அதிகாரத்தை அதன் கீழுள்ள நிர்வாக அமைப்புகளுக்கு வழங்கும் சாத்தியமில்லை. இதன் பொருள் என்னவென்றால், மாகாண சபைகள் எந்தச் சட்டத்தையும் நிறைவேற்ற அதிகாரமற்றவை என்பதே” என்று கூறியுள்ளார்.
இன்றுள்ள ஒருமித்த சிறிலங்க அரசமைப்பு (Unitary Srilankan Constitution) சட்டத்தின் கீழ் அதிகாரப் பகிர்வு என்பது சாத்தியமில்லை என்பதை சிறிலங்க முன்னாள் அதிபர் சந்திரிகாவும், அவரது அரசில் சட்ட அமைச்சராக இருந்த பேராசிரியர் ஜி.எல். பெய்ரிசும் கூறியிருந்ததையும் சுரேஷ் சுட்டிக்காட்டியுள்ளார்.
“1987ஆம் ஆண்டு கையெழுத்திடப்பட்ட இந்திய-சிறிலங்க ஒப்பந்தத்தின்படி மேற்கொள்ளப்பட்ட 13வது அரசமைப்புச் சட்டத் திருத்தத்தின்படி அதிகாரப் பகிர்வு பரிசோதிக்கப்பட்டு தோற்றுவிட்டது. எனவே இதுபற்றி இந்தியாவும், தமிழகமும் பேசுவது பொருளற்றது” என்று சுரேஷ் பிரேமசந்திரன் கூறியுள்ளார்.
“சிங்கள மனப்பாங்கு தமிழர்களையோ முஸ்லீம்களையோ ஏற்காது. தமிழர்களை அழித்தால்தான் சிங்கள தேசியம் செழிக்கும் என்று சிங்கள தலைவர்கள் உறுதியாக நம்புகின்றனர். சிங்கள இனவெறி தமிழர் தேசியத்துடன் ஒருநாளும் இணைந்திருக்க ஒப்புக்கொள்ளாது” என்று சுரேஷ் பிரேமசந்திரன் கூறியுள்ளார்.
இதையே வேறு வார்த்தைகளில் சிறிலங்க சுதந்திரக் கட்சியின் நாடாளுமன்ற உறுப்பினர் மங்கள சமரவீர பேசியுள்ளதும் குறிப்பிடத்தக்கது.
இனவாதமே அரசின் கொள்கை!
webdunia photo
FILE
சிறிலங்க நாடாளுமன்றத்தில் நிதிநிலை அறிக்கையின் மீது நடந்துள்ள விவாதத்தில் பங்கேற்றுப் பேசிய சிறிலங்க சுதந்திராக் கட்சியின் உறுப்பினர் மங்கள சமரவீர, “அரசாங்கத்திலிருந்த ஒரு பிரிவினரே அன்று இனவாதம் பேசினர். இன்று இனவாதமே அரசாங்கத்தின் கொள்கையாக மாறியுள்ளது” என்று கூறியுள்ளார்.
இலங்கை சிங்கள பௌத்த நாடல்ல. இலங்கையர் அனைவருக்கும் சொந்தமான நாடாகும் என்று கூறிய சமரவீர, வியட்நாமில் வீசப்பட்ட குண்டுகளை விட, வடக்கில் வீசப்பட்ட குண்டுகளின் எண்ணிக்கை அதிகம் என்பதனால்தான் தமிழ்நாட்டில் தமிழர்கள் கொதித்தெழுந்துள்ளனர் என்று உண்மையை அப்படமாகப் போட்டு உடைத்துள்ளார்.
அதுமட்டுமின்றி, இன்று இனவாதம் அரசாங்கத்தின் கொள்கையாகவே இருக்கின்றது என்பதனால் தான் பாதுகாப்பு அமைச்சரின் செயலாளரும், அமைச்சரும் சிறுபான்மையினரை (தமிழர்களை) ஓரங்கட்ட முயற்சிப்பதுடன் முஸ்லிம்களையும் உசுப்பி விட முயற்சிக்கின்றனர் என்று குற்றம் சாற்றியுள்ளார்.
இலங்கை இனப் பிரச்சனைக்கு பேச்சுவார்த்தையின் மூலம் அரசியல் தீர்வோ, அதிகாரப் பகிர்வின் மூலம் அரசியல் உரிமைகளோ தமிழர்களுக்கு கிடைக்காது என்பது இதன் மூலம் தெள்ளத் தெளிவாக விளங்கியுள்ளது.
எனவே மத்திய அரசு இப்பிரச்சனையில் தனது நிலைப்பாட்டை மாற்றிக்கொள்ள முன்வரவேண்டும். தமிழர்களுக்கு ஏற்பற்ற ஒரு அரசியல் யோசனையை அவர்களின் ஒப்புதலின்றி, அவர்களை ஒடுக்குவதே ஒரு கொள்கையாகக் கொண்டுள்ள இனவாத அரசிற்கு கூறுவது, தமிழர்களை ஒடுக்கும் அதன் திட்டத்திற்கு மறைமுக உதவுமே தவிர, பிரச்சனையை தீர்க்காது.
