கிரிக்கெட் வீரர்களுக்கு ரொக்கப் பரிசு அளித்து ஊக்குவிப்பதைப் போல நமது நாட்டிற்கு பெருமை சேர்த்த தங்களுக்கும் ரொக்கப் பரிசு அளித்து ஊக்குவிக்க வேண்டும் என்று இந்திய ஹாக்கி அணியின் பயிற்சியாளர் கர்வாலோ குரலெழுப்பியிருப்பது கவனிக்கத்தக்கதாகும்.
முதல் முறையாக நடைபெற்ற இருபதுக்கு20 உலகக் கோப்பை கிரிக்கெட் போட்டியில் இளம் வீரர்களைக் கொண்ட இந்திய அணி ஒவ்வொரு போட்டியிலும் மிகச் சிறப்பாக விளையாடி சாம்பியன் கோப்பையை வென்றதற்காக அவர்கள் மீது பரிசு மழை பொழிவதை யாரும் எதிர்க்கப் போவதில்லை.
webdunia photo
FILE
கிரிக்கெட் வாரியம் இந்திய அணியில் இடம்பெற்ற எல்லா வீரர்களுக்கும் சேர்த்து 10 மில்லியன் டாலர்களை (8 கோடி ரூபாய்) ரொக்கப் பரிசாக வழங்கியது. 6 பந்துகளில் 6 சிக்ஸர்களை அடித்து இங்கிலாந்து அணியை நிலைகுலையச் செய்த யுவராஜ் சிங்கிற்கு சிறப்புப் பரிசாக ரூபாய் 1 கோடி அறிவிக்கப்பட்டது.
இவைகள் மட்டுமின்றி, தமிழக அரசு உட்பட ஒவ்வொரு மாநில அரசும் அந்தந்த மாநிலங்களைச் சேர்ந்த கிரிக்கெட் வீரர்களுக்கு 5 லட்சம், 10 லட்சம் என்று அள்ளித் தெளித்தன. இவையாவும் அவர்கள் ஆடிய ஆட்டத்திற்கு பாராட்டாகவும், இப்படியே தொடர்ந்து ஆடவேண்டும் என்று ஊக்குவிக்கவும் வழங்கப்பட்டது. ஆனால் அதுவே தற்பொழுது வேறொரு பிரச்சனையை கிளப்பியுள்ளது.
கிரிக்கெட் வீரர்களுக்கு அளிக்கப்படும் முன்னுரிமைகளும், பரிசுகளும் அதே அளவிற்கு நமது நாட்டின் பெருமைகளை உயர்த்திய மற்ற விளையாட்டு வீரர்களுக்கு வழங்கப்படாதது ஏன் என்பதே அந்தக் குமுறல்.
webdunia photo
FILE
நியாயமானதுதான். சமீபத்தில் சென்னையில் நடந்து முடிந்த ஆசிய கோப்பை ஹாக்கிப் போட்டியில் இந்திய ஹாக்கி அணி மிகச் சிறப்பாக விளையாடி இறுதிப் போட்டியில் பலம் வாய்ந்த தென் கொரிய அணியைத் தோற்கடித்து சாம்பியன் பட்டத்தை வென்றது. சர்வதேசப் போட்டிகளில் குறிப்பிடத்தக்க அளவிற்கு வெற்றிபெறாத நிலையில், ஆசிய கோப்பை போட்டியில் இந்திய அணி வென்றது குறிப்பிடத்தக்கது, பெருமைக்குரியது.
ஆனால், அந்த வெற்றியைப் பெற்றுத் தந்த வீரர்களுக்குப் பாராட்டும், பரிசுப் பண மழையும் பொழியவில்லை. இந்த மனப்பான்மையை கடுமையாக சாடியுள்ளார் இந்திய ஹாக்கி அணியின் பயிற்சியாளர் கர்வாலோ.
கிரிக்கெட்டிற்கு காட்டப்படும் அந்தச் சலுகையும் கருணையும், ஹாக்கி உள்ளிட்ட மற்ற விளையாட்டு வீரர்களுக்கு காட்டப்படாதது ஏன் என்று உறுமிய கர்வாலோ, இந்த மாற்றாந்தாய் மனப்பான்மையைக் கண்டித்து ஹாக்கி வீரர்கள் உண்ணாவிரதப் போராட்டத்தில் ஈடுபடுவார்கள் என்றும் எச்சரித்தார். அதற்குப் பலனும் கிடைத்துள்ளது.
கர்நாடகத்தைச் சேர்ந்த இந்திய அணி கிரிக்கெட் வீரர்களுக்கு ரொக்கப் பரிசு அறிவித்த அம்மாநில முதலமைச்சர் குமாரசாமி, கர்வாலோவின் குமுறலைக் கண்டு ஹாக்கி வீரர்களுக்கும் ரொக்கப் பரிசு அறிவித்தார். இன்று, மேலும் ஒரு நல்ல செய்தியாக, ஹாக்கி வீரர்கள் ஒவ்வொருவருக்கும் ரூ.5 லட்சம் ரொக்கப் பரிசு வழங்கப்படும் என்று பாரத அரசு வங்கி அறிவித்துள்ளது.
webdunia photo
FILE
ஆசிய கோப்பையை வென்றவுடனேயே இந்திய ஹாக்கி கூட்டமைப்பு ரொக்கப் பரிசை அறிவித்திருக்கலாம். அங்கு மட்டும் பணம் இல்லையா என்ன? மனம்தான் இல்லை! சில வாரங்களுக்கு முன்பு இந்திய கால்பந்து அணி நேரு கோப்பையை வென்றது. அருமையான வெற்றி அது. கடுமையான போட்டிகளுக்கு இடையே மிகச் சிறப்பாக திறனை வெளிப்படுத்திய இந்திய கால்பந்தாட்ட அணி, இறுதிப் போட்டியில் சர்வதேச தரவரிசையில் தங்களை விட பல படிகள் முன்னிலையில் உள்ள ... அணியைத் தோற்கடித்தது.
webdunia photo
FILE
இந்த வெற்றி மைதானத்தின் கொண்டாட்டத்துடன் முடிந்துபோயிற்று. சமீபத்தில் சர்வதேச அளவில் நடைபற்ற ஸ்னூக்கர் போட்டியில் கர்நாடகத்தைச் சேர்ந்த இளம் வீரர் பங்கஜ் அத்வானி சாம்பியனானார். இது மிக மிக பெருமைக்குரிய வெற்றியாகும். பில்லியட்ஸில் இந்திய வீரர்கள் நெடுங்காலமாக சிறப்பான நிலையில் இருந்தது மட்டுமின்றி, சாம்பியன் பட்டத்தையும் வென்றுள்ளனர். அரவிந்த் சவூர், சாண்டில்யா ஹபீப், கீத் சேத்தி போன்றவர்கள் இந்தியாவின் பெருமையை உயர்த்தியவர்கள்.
webdunia photo
FILE
ஆனால், ஸ்னூக்கரில் அந்த நிலை இல்லை. அதனை சமீப காலமாக இந்தியாவைச் சேர்ந்த இளம் வீரர்கள் மாற்றி வருகின்றனர். அதன் உச்சமாக பங்கஜ் அத்வானி சாம்பியன் பட்டம் வென்றது மிகுந்த பெருமைக்குரியதாகும். ஆனால், அந்த ஆட்டத்தை பரவலாக மக்கள் தெரியாதிருப்பதால் அதன் பெருமையும் பெரிதாக வெளிப்படவில்லை.
இருந்தாலும், அரசும், விளையாட்டு கூட்டமைப்புகளும் அந்த வீரர்களை (கிரிக்கெட் வாரியம் செய்வதைப் போல) நன்கு பெருமைப்படுத்தியிருக்க வேண்டும். இந்திய அரசு அர்ஜூனாவில் இருந்து ராஜீவ் கேல் ரத்னா வரை விருதுகள் வழங்கி கெளரவிக்கிறது. ஆயினும், ரொக்கப் பரிசும் வழங்குவது அவர்களின் திறனை மெச்சுவதாகவும், அதனை அங்கீகரித்து ஊக்குவிப்பதாகவும் அமையும்.
தமிழ்நாட்டிலும், ஆந்திரத்திலும், மராட்டியத்திலும் அற்புதமான கேரம் விளையாட்டு வீரர்கள் இருந்தார்கள், இருக்கின்றார்கள், உருவாகி வருகிறார்கள். டெல்லி, மரியா இருதயம், புண்ணியக்கோட்டி, ராதாகிருஷ்ணன், அந்தோணிராஜ் ஆகியவர்களின் ஆட்டம் நம்மை மெய்மறக்கச் செய்யும். ஆனால், அவர்களின் திறனிற்கு கிடைத்ததெல்லாம் சராசரி எழுத்தர் வேலையும், வெற்றிக் கோப்பையும், மெடல்களும்தான். ரொக்கப் பரிசென்று ஏதும் அளிக்கப்படாததால் அந்த முன்னாள் சாம்பியன்களின் வாழ்க்கை இன்று வரை சந்துகளுக்கு அமைந்துள்ள எலிக் கூண்டு வீடுகளில்தான் முடங்கிக் கிடக்கிறது.
இந்த நிலை மாறவேண்டும். மாநில அளவில், தேச அளவிலும், சர்வதேச அளவிலும் வெற்றி பெறும் வீரர்களுக்கு மாநில அரசுகளும், மத்திய அரசின் இளைஞர் நலம் மற்றும் விளையாட்டுத் துறையும், இந்திய ஒலிம்பிக் சங்கமும் ஒரு குறிப்பிட்ட ரொக்கப் பரிசை நிர்ணயித்து அளிக்க வேண்டும். கிரிக்கெட் வாரியத்திற்கு இணையாக அவ்வளவு பெரும் தொகை வழங்க முடியாது என்றாலும், அவர்களின் வாழ்நிலை உயரக்கூடிய அளவிற்கு அந்த ரொக்கப் பரிசுகள் இருக்க வேண்டும்.
