பன்னாட்டு நிறுவனத்தில் வேலை வேண்டுமா?

மாணவ, மாணவிகள் பயன் பெறும் வகையில் சேலம் மாவட்டம் தம்மம்பட்டியில், தொழில் பழகுனர் பயிற்சி வாரியம் சார்பில் மிகப்பெரிய வேலைவாய்ப்பு முகாம் நடைபெறவுள்ளது.

தம்மம்பட்டி அரசு மேல்நிலைப்பள்ளி வளாகத்தில் வரும் 13 ஆம் தேதி காலை 9 மணி முதல் மாலை 5 மணி வரை இந்த வேலைவாய்ப்பு முகாம் நடைபெறுகிறது.

கடந்த 2006, 2007 மற்றும் 2008 ஆம் ஆண்டில் தேர்ச்சி பெற்ற பொறியியல் பட்டதாரிகள், டிப்ளமோ மாணவர்கள், பிளஸ் 2 பாடத்தில் தொழிற்பாடப் பிரிவை எடுத்து படித்து வரும் மாணவர்கள் இந்த பயிற்சியில் சேரத் தகுதி உடையவர்கள்.

இந்த வேலைவாய்ப்பு முகாமில் சேர விரும்பும் மாணவர்கள் தங்களின் அசல் சான்றிதழ்கள், சுய விவரக்குறிப்புகள் மற்றும் சான்றிதழ்களின் நகல்களுடன் இதில் கலந்து கொள்ளலாம்.

டி.வி.எஸ்., நோக்கியா, மோட்டரோலா, யுண்டாய் கார் நிறுவனம் உள்ளிட்ட நாட்டின் முன்னணி பன்னாட்டு நிறுவனங்கள் இந்த வேலைவாய்ப்பு முகாமில் பங்கேற்கின்றன. சேலம் மாவட்ட ஆட்சித் தலைவர் என். மதிவாணன், வேலைவாய்ப்பு முகாமை தொடங்கி வைக்கிறார்.