என்னை அறிந்தால் படம் தந்த பிரபல்யத்துக்குப் பிறகு நாயகனாக மட்டுமே - தமிழில் நடிப்பது என முடிவு செய்துள்ளார், அருண் விஜய்.
அப்படி அவர் தேர்வு செய்திருக்கும் முதல் படத்தை ஈரம் அறிவழகன் இயக்கி வருகிறார்.
மெடிக்கல் க்ரைம் த்ரில்லர் என அறிவழகனால் வகைப்படுத்தப்பட்டிருக்கும் இந்தப் படத்தின் முக்கியமான காட்சி ஒன்றை சென்னை பள்ளிக்கரணை பகுதியில் படமாக்கினார். இங்கு குப்பைமேடு ஒன்று உள்ளது. அதில் தொடர்ச்சியாக 36 மணிநேரம் படப்பிடிப்பை நடத்தினார் அறிவழகன்.
விட்டுவிட்டு நடத்துவதற்கு ஏற்ற இடம் அதுவல்ல என்பதால் தொடர்ச்சியாக படப்பிடிப்பை நடத்தியுள்ளார். படப்பிடிப்பில் கலந்து கொண்டவர்கள் அனைவரும் உரிய மருத்துவ பாதுகாப்புடனே வேலை செய்திருக்கிறார்கள்.
இந்தப் படத்தில் அருண் விஜய் ஜோடியாக மகிமா நம்பியார் நடித்து வருகிறார்.
