சிவகார்த்திகேயன் நடிப்பில் சமீபத்தில் வெளிவந்த அமரன் திரைப்படம், ரசிகர்களிடையே நல்ல வரவேற்பை பெற்று வரும் சூழலில், இந்த படத்திற்கு சில அமைப்புகள் கடும் எதிர்ப்பு தெரிவித்து, அமரன் திரையிடப்படும் தியேட்டர்களில் போராட்டங்களை நடத்துவதாக செய்திகள் வெளியாகின.
இந்த நிலையில் நெல்லையில் அமரன் படம் திரையிடப்பட்டு வந்த திரையரங்கில் குண்டு வெடித்ததாக தகவல் வெளியாகி, பரபரப்பை ஏற்படுத்தியுள்ளது. இந்திய ராணுவத்தில் பணிபுரிந்த மேஜர் முகுந்த் அவர்களின் வாழ்க்கையை மையமாகக் கொண்ட அமரன் திரைப்படம், பெரிய வெற்றியை பெற்றிருந்தாலும், ஒரு குறிப்பிட்ட சமூகத்தை தீவிரவாதிகளாக காட்டியதாக குற்றம்சாட்டி சில அமைப்புகள் கண்டனத்துடன் போராட்டம் நடத்தி வந்தன.
அமரன் திரையிடப்படும் தியேட்டர்களின் முன்னால் போராட்டம் நடத்தப்படும் என அந்த அமைப்புகள் எச்சரிக்கை விடுத்திருந்த நிலையில், திடீரென நெல்லையில் உள்ள திரையரங்கில் குண்டு வீசப்பட்டுள்ள செய்தி அனைவரையும் அதிர்ச்சியில் ஆழ்த்தியுள்ளது.
நெல்லை மேலப்பாளையம் பகுதியில், அமரன் படம் திரையிடப்பட்ட திரையரங்கில் மர்ம நபர்கள் பெட்ரோல் குண்டை வீசி தப்பிச் செல்வதாகவும், இந்த சம்பவம் இன்று அதிகாலை நிகழ்ந்ததாகவும் தகவல்கள் தெரிவிக்கின்றன. சிசிடிவி காட்சிகளை கொண்டு மேலப்பாளையம் போலீசார் தீவிர விசாரணை செய்து வருவதாக கூறப்படுகிறது.
