ஆசியப் போட்டிகள்: இந்தியத் திறனிற்கு மேலும் ஒரு வாய்ப்பு

FILE

சீனாவின் குவாங்சோ நகரில் இன்று மாலை கோலாகலமாகத் தொடங்கவுள்ள 16வது ஆசிய விளையாட்டுப் போட்டிகள் தங்கள் திறனை வெளிப்படுத்த இந்தியாவின் வீரர், வீராங்கனைகளுக்கு கிடைத்துள்ள மற்றுமொரு கடுமையான அதே நேரத்தில் சிறப்பான வாய்ப்பாகும்.

‘போட்டியில்லையேல் விளையாட்டில்லை’ எனபதை இந்த ஆசியப் போட்டிகள் மிகப் பெரிய அளவிற்கு நிரூபிக்கப்போகின்றன. ஒரு நேரத்தில் ஆசிய நாடுகளின் போட்டியாளர்களுக்கும், உலகின் முன்னேறிய மேற்கத்திய நாடுகளின் போட்டியாளர்களுக்கும் மிகப் பெரிய இடைவெளி இருந்தது. அதனால் ஆசியப் போட்டிகள் என்பது மிகச் சாதாரணமாக மதிப்பிடப்பட்டதாக இருந்தது. ஆனால் அந்த நிலை இப்போது பெருமளவிற்கு மாறிவிட்டது. காரணம், ஆசிய நாடுகளில் விளையாட்டு வசதிகளும், பயிற்சி வாய்ப்புகளும், நாடுகளுக்கு இடையிலான சர்வதேசப் போட்டிகளும் உலகளாவிய பல திறனாளர்களை உருவாக்கியுள்ளது. இன்றைக்கு ஆசியா என்பது உலகப் பொருளாதாரத்தில் எப்படி ஒரு அசைக்க முடியாத சக்தியாக உருவெடுத்துள்ளதோ அதற்கு இணையாக விளையாட்டிலும் பெரும் சக்தியாக வளர்ந்து வருகிறது.

எனவே, இன்று முதல் வரும் 27ஆம் தேதி வரையிலான அடுத்த இரண்டு வார காலத்திற்கு பல உலக, ஒலிம்பிக் சாதனைகள் ஆசியப் போட்டிகளில் படைக்கப்படும் வாய்ப்பு உள்ளது. சோவியத் நாட்டின் அங்கமாக இருந்த உஸ்பெக்கிஸ்தான், கஜகஸ்தான், துர்க்மானிஸ்தான் ஆகிய நாடுகள் உலகத் தரம் கொண்ட விளையாட்டு போட்டியாளர்களைக் கொண்டுள்ள நாடுகளாகும். இவற்றோடு ஆசிய விளையாட்டு வல்லரசுகளாக சீனா, ஜப்பான், ஈரான், தென் கொரியா, வட கொரியா, இந்தியா ஆகிய நாடுகளின் போட்டியாளர்களும், அணிகளும் பங்கேற்பதால், போட்டிகள் கடுமையாக இருக்கும், அதுவே புதிய சாதனைகளுக்கும் வழி வகுக்கும்.

2008ஆம் ஆண்டு தனது தலைநகரில் ஒலிம்பிக் போட்டிகளை ஆச்சரியப்படதக்க அளவிற்கு வெற்றிகரமாக நடத்தியது மட்டுமின்றி, அதில் தனது விளையாட்டுப் பலத்தை சிறப்பாக நிரூபித்தது சீனா. அடுத்த இரண்டு ஆண்டுகளிலேயே அந்நாடு ஆசியப் போட்டிகளை நடத்துகிறது. பாதுகாப்பிற்கு மட்டும் 300 மில்லியன் டாலர்களைச் செலவு செய்யும் சீன அரசு, விளையாட்டுக் கட்டுமானங்களை மிக சிறப்பாக வடிவமைத்து உருவாக்கியுள்ளது. எனவே நமது நாட்டில் நடத்தப்பட்ட காமன்வெல்த் போட்டிகள் போல் இல்லாமல், எல்லா விதத்திலும் சிறப்பான சர்வதேச போட்டியை சீனா நடத்திக்காட்டப் போகிறது.

காமன்வெல்த் போன்று அங்கீகாரமற்ற, நட்பு ரீதியான போட்டிகள் அல்ல ஆசியாத் போட்டிகள். இதில் செய்யப்படும் சாதனைகள் அனைத்தும் சர்வதேச ஒலிம்பிக் சங்கங்களின் கூட்டமைப்பின் சாதனை பட்டியலில் இடம் பெறத்தக்கவையாகும். எனவே போட்டிகள் மிகக் கடுமையாக இருக்கும்.

ஆசியக் கண்டத்திலுள்ள 45 நாடுகளின் 6,000க்கும் அதிகமான போட்டியாளர்கள் இதில் பங்கேற்கப்போகின்றனர். ஒலிம்பிக் போட்டிகளைப் போல் 42 விளையாட்டுகள் நடைபெறப்போகின்றன. இதில் இந்தியாவின் சார்பாக 609 விரர்களும், வீராங்கனைகளும் 32 விளையாட்டுப் போட்டிகளில் பங்கேற்கவுள்ளனர்.

இந்தியாவின் நம்பிக்கை நட்சத்திரங்கள்!

FILE

சீன நாட்டின் மிகச் சிறந்த போட்டியாளர்கள் அந்நாட்டின் பெருமையை சொந்த மண்ணில் மீண்டும் ஒரு முறை நிலைநிறுத்த களமிறங்குகிறார்கள். 110 மீட்டர் தடையோட்டத்தில் உலக சாதனையாளராகத் திகழும் லியூ ஜியா ஓடப்போவது பெரும் எதிர்ப்பார்ப்பை ஏற்படுத்தியுள்ளது. சீன நாட்டின் உலகப் புகழ் பெற்ற துப்பாக்கிச் சுடுதல் வீரர்களான ஜூ குவின்னான், வாங் தாவோ ஆகியோர் நமது நாட்டின் உலக சாதனையாளர்களான அபினவ் பிந்த்ரா, ககன் நரங் ஆகியோருக்கு பெரும் சவாலாக இருப்பார்கள்.

இந்தியாவைப் பொறுத்தவரை, எப்படி டெல்லி காமன்வெல்த் போட்டிகளில் ஒட்டுமொத்தமாக 100 பதக்கங்களை வெல்வது என்ற குறிக்கோளுடன் இறங்கி சாதித்ததோ, அதேபோல், இந்த 16வது ஆசியப் போட்டிகளில் முதல் 5 இடத்திற்குள் வரவேண்டும் என்ற இலக்குடன் உள்ளது. 2006ஆம் ஆண்டு தோஹாவில் நடைபெற்ற ஆசியப் போட்டிகளில் இந்தியா 53 பதங்கங்களைப் பெற்று (10 தங்கம், 17 வெள்ளி, 26 வெங்கலம்) 8 இடத்தைப் பெற்றது. இந்த முறை, இன்றுள்ள திறனை அடிப்படையாக வைத்துப் பார்க்கும்போது இந்தியா முதல் 5 இடங்களுக்குள் வந்துவிடும் என்று நம்பலாம். டெல்லியில் 1982ஆம் ஆண்டு நடைபெற்ற ஆசியப் போட்டிகளில்தான் இந்தியா கடைசியாக 5வது இடத்தைப் பெற்றது என்பது நினைவில் கொள்ளத்தக்கதாகும். 195ஆம் ஆண்டு முதல் முறையாக ஆசியப் போட்டிகள் நடைபெற்றபோது 15 தங்கப் பதக்ககங்களுடன் 51 பதங்கங்களைப் பெற்று இந்தியா 2வது இடத்தைப் பெற்றது. ஆனால் அந்த தங்க நாட்களை இன்று நினைத்துப் பார்ப்பதற்கில்லை.

32 விளையாட்டுப் போட்டிகளில் பங்கேற்றாலும் இந்தியாவின் வீரர், வீராங்கனைகள் தங்கம் வெல்லும் வாய்ப்புள்ள போட்டிகள் என்று பார்த்தால், நாம் உலகின் ஒரு குறிப்பிடத்தக்க சக்தியாக திகழும் துப்பாக்கிச் சுடுதல் முதலிடத்தில் உள்ளது. காமன்வெல்த் போட்டிகளிலும் கடும் போட்டிக்கிடையே 4 தங்கங்களை வென்ற ககன் நரங், பீஜிங் ஒலிம்பிக்கில் தங்கம் வென்ற அபினவ் பிந்த்ரா ஆகியோர் தங்க நம்பிக்கைகள். இவர்களைத் தவிர சம்ரேஷ் ஜங், ஹரி ஓம் சிங், இம்ரான் ஹாசன் கான், தீபக் சர்மா, விஜய் குமார், குர்பிரீத் சிங், ஹர்பிரீத் சிங், மனாவ்ஜித் சிங், மான்ஷேர் சிங் ஆகியோர் ஆண்கள் துப்பாக்கிச் சுடுதலில் குறிப்பிடத்தக்கவர்களாவர்.

மகளிர் பிரிவில் சூமா ஷிரூர், தேஜாஸ்வினி சவந்த், சீமா தோமர், ஆகியோர் பதக்கம் வெல்லும் வாய்ப்புடைவர்களாவர். துப்பாக்கிச் சுடுதலில் மட்டும் 14 தங்கப் பதக்கங்களுடன் 30 பதங்கங்களை காமன்வெல்த் போட்டிகளில் வென்ற இந்திய போட்டியாளர்கள் அதே அளவிற்கு ஆசியாத்திலும் வெலவார்கள் என்று எதிர்பார்க்க முடியாது என்றாலும், நிச்சயமாக இந்தியாவின் திறன் ஏராளமான பதக்கங்களைப் பெற்றுதரும் என்பதில் சந்தேகமில்லை.

காமன்வெல்த் போட்டிகளில் துப்பாக்கிச் சுடுதலிற்கு அடுத்த இடத்தில் 10 தங்கப் பதக்கங்களுடன் 19 பதக்கங்களை வென்றவர்கள் மல்யுத்த வீரர்கள். ஆனால், ஆசியாத் போட்டிகளில் ஈரான், ஜப்பான், பழைய சோவியத் ஒன்றியத்தின் அங்கமாயிருந்து நாடுகள் ஆகியவற்றின் போட்டி இந்திய போட்டியாளர்களுக்கு பெரும் சவால்களாக இருப்பார்கள்.

இந்தியாவின் மிகச் சிறந்த வீரரான சுசீல் குமார் காயம் காரணமாக இப்போட்டிகளுக்கு செல்லாதது இழப்பே. ஆயினும் இந்தியாவிற்காக களமிறங்கும் கீதா குமாரி (55 கிகி பிரிவு), அனில் குமார் (96), இராஜேந்தர் குமார் (55), இரவீந்தர் குமார் (60 கிகி) ஆகியோ்ர் பதக்கம் வெல்லும் வாய்ப்புடையவர்களாவர்.

தோஹா ஆசியப் போட்டிகளில் 6 பதங்களை வென்றது நம் நாடு, எனவே இம்முறை அதைவிட கூடுதலாக பதக்கங்களை வெல்லும் வாய்ப்புள்ளது.

FILE

குத்துச் சண்டையில் இந்தியாவிற்கு பல பதக்க வாய்ப்புகள் உள்ளன. காமன்வெல்த் போட்டியில் நடுவரின் தன்னிச்சையான, தவறான முடிவால் பதக்க வாய்ப்பை இழந்த விஜேந்தர், ஒலிம்பிக் பதக்கம் பெற்று பெருமை சேர்த்ததுபோல், இப்போது நிச்சயம் பதக்கம் வெல்வார்.

சுரன்ஜோய் (52 கிகி பிரிவு), மனோஜ் குமார் (64), பரம்ஜித் சமோட்டா (91+) அமனதீப் சிங் (49), ஜெய் பகவான் (60 கிகி) ஆகியோர் பதக்க வாய்ப்பு அதிகம் உள்ளவர்களாவர்.

தடகளம் பெருமைத் தேடித் தரும்!

காமன்வெல்த் போட்டிகளை விட, ஆசியாத் போட்டிகள் இந்தியாவின் தடகள போட்டியாளர்களுக்கு பதக்கம் வெல்லும் வாய்ப்பையும், தங்கள் திறனை மெய்ப்பிக்கும் வாய்ப்பையும் ஒரு சேர அளிக்கக் கூடியது ஆசியாத் ஆகும்.

இந்தியாவின் தடகள வீராங்கனைகள் காமன்வெல்த் போட்டிகளின் 4x400 மீட்டர் தொடர் ஓட்டத்தில் தங்கம் வென்றதைப் போல் இப்போட்டிகளிலும் தங்கம் வெல்லும் வாய்ப்பு உள்ளது. 800 மீட்டர் ஓட்டப் பந்தயத்தில் காமன்வெல்த் போட்டிகளில் சிறப்பாக ஓடியும் கடைசி நேரத்தில் அந்த வாய்ப்பை இழந்தவரான தங்க மங்கை பி.டி.உஷாவின் தயாரிப்பான டி‌ண்டு லூகா ஆசியாத்தில் சாதிப்பார் என்று நிச்சயம் எதிர்பார்க்கலாம்.

காமன்வெல்த் போட்டிகளில் 17 மீட்டருக்கு மேல் முத்தாண்டலில் தாண்டி வெங்கலப் பதக்கம் வென்றி ரென்ஜித் மகேஸ்வரி, மகளில் வட்டு எறிதலில் கிருஷ்ண பூன்னியா உள்ளிட்ட மூன்று இடங்களையும் வென்ற இந்திய வீராங்கனைகள், 4x100 மீட்டர் தொடர் ஓட்டத்தில் அபாரமாக ஓடி புதிய சாதனை நிகழ்த்திய இந்திய ஆடவர் அணி ஆகியன இந்தியாவின் பெருமையை மேலும் உயர்த்தும்.

FILE

இவர்களைத் தவிர, தங்களின் தனித்த திறமையால் உலகின் தலை சிறந்த விளையாட்டாளர்களாத் திகழும் சாய்னா நேவால் (பாட்மின்டன்), சானியா மிர்சா, சோம்தேவ் தேவ்வர்மன் (டென்னிஸ்), டோலா பானர்ஜி, தீபிகா குமாரி, ராகுல் பானர்ஜி (வில்வித்தை), பங்கஜ் அத்வானி (பில்லியட்ர்ஸ்), தமிழ்நாட்டின் டேபிள் டென்னிஸ் வீரர் சரத் கமல் ஆகியோர் பதக்கப் பட்டியலில் இந்தியாவின் பெயரை எப்போது மேலிடத்தில் வைத்திருப்பார்கள் என்று பார்க்கலாம்.

ஆக, காமன்வெல்த போட்டிகளை விட சிறப்பான போட்டிகளையும் அதில் வெளிப்படும் இந்திய போட்டியாளர்களின் திறனையும் பார்த்து நன்கு ரசிக்கலாம்.