ஒருங்கிணைந்த குருப்-4 தேர்வில் சான்றிதழ் சரிபார்ப்புக்கு அழைக்கப்பட்ட தேர்வர்களின் பட்டியல் www.tnpsc.gov.in என்ற இணையதளத்தில் வெளியாகியுள்ளதாக டிஎன்பிஎஸ்சி அறிவிப்பு வெளியிட்டுள்ளது. இதுகுறித்து வெளியான செய்திக்குறிப்பில் கூறப்பட்டுள்ளதாவது:
ஒருங்கிணைந்த குருப்-4 தேர்வை எழுதிய விண்ணப்பதாரர்களின் மதிப்பெண் மற்றும் தரவரிசை பட்டியல் அக்டோபர் 28-ம் தேதி தேர்வாணையத்தின் இணையதளத்தில் வெளியிடப்பட்டது.
இதைத்தொடர்ந்து, தற்போது, மதிப்பெண், தரவரிசை மற்றும் இட ஒதுக்கீடு அடிப்படையில் கணினி வழி சான்றிதழ் சரிபார்ப்புக்கு தற்காலிகமாக அனுமதிக்கப்பட்ட தேர்வர்களின் பட்டியல் தேர்வாணையத்தின் www.tnpsc.gov.in என்ற இணையதளத்தில் வெளியிடப்பட்டுள்ளது.
சான்றிதழ் சரிபார்ப்புக்கு அனுமதிக்கப்பட்டுள்ள தேர்வர்கள் தங்கள் சான்றிதழ்களை நவம்பர் 9-ம் தேதி முதல் 21-ம் தேதி வரை தேர்வாணையத்தின் இணையதளத்தின் ஒரு முறை பதிவு பிரிவு (ஒடிஆர்) வாயிலாக பதிவேற்றம் செய்யலாம்’ என செய்திக்குறிப்பில் கூறப்பட்டுள்ளது.
குருப்-4 தேர்வு முடிவுகள் வெளியான 6 நாட்களில் சான்றிதழ் சரிபார்ப்புக்கு அனுமதிக்கப்பட்டோர் பட்டியல் வெளியாகியுள்ளது என்பது குறிப்பிடத்தக்கது.
