ஆளுநரின் வழக்கு விவகாரம் குறித்து உச்ச நீதிமன்றத்திடம் குடியரசுத் தலைவர் 14 கேள்விகளை எழுப்பியிருந்தார் என்பதை ஏற்கனவே பார்த்தோம். இதற்கு முதல்வர் மு.க.ஸ்டாலின் கண்டனம் தெரிவித்துள்ளார்.
மாநில மசோதாக்கள் குறித்து முடிவெடுப்பதற்கு ஆளுநர் மற்றும் குடியரசுத் தலைவருக்கு காலக்கெடுவை உச்ச நீதிமன்றம் விதித்தது.
இதற்கு எதிர்ப்பு தெரிவித்த குடியரசு தலைவர் உச்சநீதிமன்றத்திடம் ஆலோசனை கேட்கும் அரசியலமைப்பு சட்டப்பிரிவு 143-ன் கீழ் மசோதாவுக்கு ஒப்புதல் வழங்க அரசியல் சாசனத்தில் கால நிர்ணயம் இல்லாதபோது உச்ச நீதிமன்றத்தால் நிர்ணயிக்க முடியுமா? என்பது உள்பட 14 கேள்விகளுக்கு கூடுதல் விளக்கம் கேட்டுள்ளார்.
இந்த நிலையில் உச்ச நீதிமன்றத்திடம் குடியரசுத் தலைவர் 14 கேள்விகளை எழுப்பி கூடுதல் விளக்கம் கேட்டிருப்பதற்கு உச்ச நீதிமன்றம் தீர்த்துவைத்த பிரச்னையை மீண்டும் தூண்டுவது கண்டனத்துக்குரியது என முதல்வர் மு.க.ஸ்டாலின் தெரிவித்துள்ளார்.
இது தொடர்பாக அவர் எக்ஸ் வலைதள் பக்கத்தில் கூறியிருப்பதாவது: தமிழ்நாடு ஆளுநரின் அதிகாரங்களைப் பற்றிய வழக்கில், ஏற்கனவே உச்ச நீதிமன்றம் வெளியிட்ட அரசியலமைப்பு நிலைப்பாட்டை மீறி, குடியரசுத் தலைவர் வழியாக மத்திய அரசு உச்ச நீதிமன்றத்திடம் விளக்கம் கேட்டது கண்டனத்துக்குரியது.
பாஜகவின் வழிகாட்டுதலின் கீழ், தமிழ்நாடு மக்களுக்கு எதிராக ஆளுநர் ரவி செயல்பட்டார் என்று இந்த நடவடிக்கை வெளிப்படுத்துகிறது. தமிழகத்தில் மக்கள் தேர்ந்தெடுத்த அரசுகளை மத்திய அரசின் பக்கவிளையாட்டு ஆளுநர்களின் கட்டுப்பாட்டில் வைப்பது, மாநில அரசுகளை பலவீனப்படுத்தும் தீவிர முயற்சியாகும். இது சட்டத்தின் முக்கியத்துவத்தையும், உச்ச நீதிமன்றத்தின் இறுதி அதிகாரத்தையும் நேரடியாக சவால் விடுகிறது.
ஆளுநர்களுக்கான கால வரம்பு இருந்தாலும், குடியரசுத் தலைவர் அதற்கு எதிர்ப்பு தெரிவிப்பது ஏன்? மசோதாவை ஒப்புதலாகக் கொண்டு, காலவரையற்ற தாமதங்களை ஏற்படுத்தி பாஜக, தனது ஆளுநர்களின் தடையை சட்ட ரீதியாக நிரூபிக்க முயற்சிக்கிறதா? மாநில சட்டசபைகளை முடக்க மத்திய அரசு முயற்சிக்கிறதா?
நாடு முக்கியமான கட்டத்தில் உள்ளது. இந்தச் சூழலில் எழும் கேள்விகள், அரசியலமைப்பின் அதிகாரப் பகிர்வை பாதித்து, எதிர்க்கட்சிகள் ஆதிக்கம் செலுத்தும் மாநில சட்டசபைகளை செயலிழக்கச் செய்யும் பாஜக தலைமையிலான மத்திய அரசின் திட்டத்தை வெளிப்படுத்துகிறது. அதனால், குடியரசுத் தலைவரின் இந்த செயல் நேரடியாக மாநில தன்னாட்சி மீது ஒரு சவால் என்றும், மாநில அரசை பலவீனப்படுத்தும் முயற்சியும் ஆகும்.
இத்தகைய மோசமான சூழலில், மாநிலங்கள் மற்றும் கட்சி தலைவர்கள் இணைந்து அரசியலமைப்பை காக்கும் சட்டப் போராட்டத்தில் முழுமையாக பங்கேற்க வேண்டும். "தமிழ்நாடு போராடும், தமிழ்நாடு வெல்லும்"
இவ்வாறு தமிழக முதல்வர் ஸ்டாலின் உறுதியுடன் கூறியுள்ளார்.
