தெருநாய்களால் கடித்து குதறப்பட்ட பச்சிளம் குழந்தை: ஹைதராபாத்தில் கொடுமை

ஹைதராபாத் அருகே உள்ள விகரபாத் ஆர்டிசி பேருந்து நிலையத்தில் 2 நாட்களே ஆன பச்சிளம் குழந்தையை அப்பகுதியில் இருந்த தெருநாய்கள் கடித்துக் குதறி கொன்ற சம்பவம் அங்கு அதிர்ச்சியை ஏற்படுத்தி உள்ளது.

கடந்த சனிக்கிழமை இரவு பேருந்து நிலையத்தில் தங்கிய இரண்டு பெண்கள் குழந்தையை அங்கேயே விட்டுச் சென்றுள்ளனர். பாதுகாப்பின்றி தனியாக கிடந்த குழந்தையை அப்பகுதியில் சுற்றித் திரிந்த தெருநாய்கள் கூட்டமாக சூழ்ந்து கடித்துக் குதறியுள்ளது.

குழந்தையின் அலறல் சத்தம் கேட்டு அப்பகுதியில் இருந்த மக்கள் ஓடி வந்து நாய்களை விரட்டியடித்தனர். எனினும், குழந்தையை நாய்கள் கடித்து, பாதி உடலை தின்றுவிட்டதால் குழந்தை உயிரிழந்தது.

இது தொடர்பாக அப்பகுதி போலீசாருக்கு தகவல் தெரிவிக்கப்பட்டது. குழந்தையின் உடலை மீட்டு அரசு மருத்துவமனைக்கு அனுப்பி வைத்த போலீசார் வழக்குப்பதிவு செய்து விசாரணை நடத்தி வருகின்றனர்.