இந்தியாவில் உள்ள பிரபல நட்சத்திர ஹோட்டல்களில் ஒன்றாக மும்பை தாஜ் ஹோட்டல் உள்ளது. இந்த ஹோட்டலில், மின்கசிவு காரணமாக ஓட்டலின் தரைத்தளத்தில் திடீர் தீ விபத்து ஏற்பட்டது. இதனால், அப்பகுதியில் கரும்புகை பீறீட்டு எழுந்தது.
இது குறித்து, தீயணைப்பு நிலையத்திற்கு தகவல் தெரிவிக்கப்பட்டது. இதனையடுத்து, விரைந்து வந்த தீயணைப்பு வீரர்கள், தீயை லாவகமாக அணைத்தனர்.
இந்த விபத்து காரணமாக, ஹோட்டலில் இருந்த பலரும் பெரும் அச்சம் அடைந்தனர். பாதுகாப்பு கருதி பலர் வெளியேற்றப்பட்டனர். பின்பு, அவர்கள் தங்கள் அறைக்கு திரும்பினர்.
இந்த தீ விபத்து குறித்து, தீயணைப்பு அதிகாரி ஒருவர் கூறுகையில், தாஜ் ஹோட்டலில் தீ விபத்து குறித்த தகவல் கிடைத்த உடனே விரைந்து வந்து தீயை கட்டுக்குள் கொண்டு வந்து அணைத்துவிட்டோம். இந்த தீ விபத்தில் உயிர்ச் சேதமோ அல்லது பொருட்சேதமோ ஏற்படவில்லை என்றார்.
