இந்தியாவின் உயரிய விருதான பாரத ரத்னா விருது அத்வானிக்கு வழங்கப்படும் எனவும் இந்தியாவின் வளர்ச்சிக்கு அவர் செய்த பங்களிப்பு மகத்தானது எனவும் பிரதமர் மோடி தெரிவித்துள்ளார்.
பாஜக மூத்த தலைவர் அத்வானிக்கு பாரத ரத்னா விருது அறிவிக்கப்பட்டுள்ளது. இதுகுறித்து தனது எக்ஸ் தளத்தில் பதிவிட்டுள்ள பிரதமர் மோடி, பாரத ரத்னா விருது அறிவிக்கப்பட்டுள்ள அத்வானியை தொடர்பு கொண்டு வாழ்த்து தெரிவித்ததாக குறிப்பிட்டுள்ளார்.
எல் கே அத்வானிக்கு பாரத ரத்னா விருது வழங்கப்படுவதைப் பகிர்ந்து கொள்வதில் நான் மிகவும் மகிழ்ச்சியடைகிறேன் என்று அவர் தெரிவித்துள்ளார்.
நம் காலத்தின் மிகவும் மதிக்கப்படும் அரசியல்வாதிகளில் ஒருவரான, இந்தியாவின் வளர்ச்சிக்கு அத்வானி செய்த பங்களிப்பு மகத்தானது என்றும் அடிமட்டத்தில் பணியாற்றியதில் இருந்து நமது துணைப் பிரதமராக நாட்டுக்கு சேவை செய்வது வரையிலான வாழ்க்கை அவருடையது என்றும் குறிப்பிட்டுள்ளார்.
உள்துறை அமைச்சராக தகவல் மற்றும் ஒளிபரப்பு துறை அமைச்சராக அத்வானி திறம்பட பணியாற்றியுள்ளார் என்று பிரதமர் மோடி புகழாரம் சூட்டி உள்ளார். அவரது நாடாளுமன்றத் தலையீடுகள் எப்பொழுதும் முன்னுதாரணமானவை, வளமான நுண்ணறிவுகள் நிறைந்தவை என்றும் அவர் கூறியுள்ளார்
பொது வாழ்வில் அத்வானியின் பல தசாப்த கால சேவையானது, அரசியல் நெறிமுறைகளில் ஒரு முன்மாதிரியான தரத்தை அமைத்து, வெளிப்படைத்தன்மை மற்றும் ஒருமைப்பாட்டுக்கான அசைக்க முடியாத அர்ப்பணிப்பால் குறிக்கப்பட்டது என்று பிரதமர் தெரிவித்துள்ளார்.
தேசிய ஒருமைப்பாடு மற்றும் கலாச்சார மறுமலர்ச்சியை மேம்படுத்துவதற்கு அவர் இணையற்ற முயற்சிகளை மேற்கொண்டுள்ளார் என்றும் அத்வானிக்கு பாரத ரத்னா விருது அறிவிக்கப்பட்டுள்ளது எனக்கு மிகவும் உணர்ச்சிகரமான தருணம் என்றும் கூறியுள்ளார்.
அவருடன் பழகுவதற்கும், அவரிடமிருந்து கற்றுக்கொள்வதற்கும் எண்ணற்ற வாய்ப்புகள் கிடைத்ததை நான் எப்போதும் எனது பாக்கியமாகக் கருதுவேன் என்று பிரதமர் மோடி குறிப்பிட்டுள்ளார்.
