இந்தியாவின் சாலை, குடும்ப விருப்பம் ஆகியவற்றை அடிப்படையாகக் கொண்டு வடிவமைக்கப்பட்ட ஹொண்டா பிரையோ சிறிய வகைக் கார் இன்று இந்தியச் சந்தையில் அறிமுகம் செய்யப்பட்டுள்ளது.
ஜப்பான் நாட்டின் புகழ்பெற்ற கார் உற்பத்தி நிறுவனமான ஹொண்டா, இந்தியாவின் சீயல் குழுமத்துடன் இணைந்து கார்களைத் தயாரித்து வருகிறது. இந்தியாவின் நடுத்தர குடும்பத்தை கருத்தில் கொண்டு வடிவமைக்கப்பட்டுத் தயாரிக்கப்பட்டுள்ள பிரையோ, 1.2 லிட்டர் பெட்ரோல் இயந்திரத்தால் இயக்கப்படுவதாகும். தற்போது சந்தையில் விற்பனையில் உள்ள ஹூண்டாய் ஐ10, மாருதி வேகன்ஆர், செவர்லே பீட் ஆகியவற்றிற்கு ஹொண்டா பிரையோ போட்டியாக வந்துள்ளது.
இரண்டு மாடல்கள் அறிமுகம் செய்யப்பட்டுள்ளன. ஒன்றின் விலை ரூ.3.95 இலட்சம் எனவும், மற்றொரு மாடல் ரூ.5.10 இலட்சம் எனவும் நிர்ணயிக்கப்பட்டுள்ளது (இது டெல்லி காட்சி அறை விலையாகும்).
இந்த கார் தயாரிப்பில் 80 விழுக்காடு உள்நாட்டிலேயே உற்பத்தி செய்யப்பட்டது என்றும், அடுத்த ஓர் ஆண்டுக் காலத்தில் 90 விழுக்காடு பாகங்கள் உள்நாட்டிலேயே உற்பத்தி செய்யப்படும் என்று ஹொண்டா சீயல் நிறுவனம் கூறியுள்ளது.
